15 дахь удаагийн энэхүү аяллаар 34 инженер “Улаанбаатар хотын Шинэ Төв цэвэрлэх байгууламж” төсөл, “Барилгачин” худалдааны төв төсөл, Майдар хот төслийн хүрээнд баригдаж байгаа “Их Майдар” цогцолбор барилгын бүтээн байгуулалттай төслийн талбай дээр нь очиж танилцав. 

Бидний очсон хамгийн эхний газар бол “Улаанбаатар хотын Шинэ төв цэвэрлэх байгууламж” төсөл байлаа. Хоногт 250.000 м3 үйлдвэрийн болон ахуйн бохир ус цэвэрлэх хүчин чадалтай тус байгууламжийг барих төслийн багийнхан буюу захиалагч БХБЯ-ны төсөл хэрэгжүүлэх нэгжийн инженер Х.Холганат, зохиогч талаас “Криатив Монголия” ХХК-ийн хяналтын инженер Н.Ёндонсамбуу, “Сивил инженеринг консалтинг” ХХК-ийн төслийн инженер Н.Цэрэнгомбо, төслийн Монголын талыг хариуцсан бизнесийн захирал Мэргэн болон гүйцэтгэгч “CTCE групп” ХХК-ийн төлөөлөл аяллын бүрэлдэхүүнийг угтан авч, төслөө танилцуулан, инженерүүдийн сонирхсон асуултад хариулав. Тус төслийн явцын хувьд 526м урттай 12,4 гкал хүчин чадалтай ус, дулаан хангамжийн ерөнхий шугамын ажил 100, бусад ажлууд 10-85 хувийн гүйцэтгэлтэй байгаа бөгөөд цаг агаар, хил гаалийн асуудлаас болоод ажлыг явц бага зэрэг удааширч буй ажээ.  Энэхүү төслийн хүрээнд цэвэрлэгээний, лаг боловсруулах, туслах зэрэг 46 барилга байгууламж баригдаж буй агаад эдгээр бүтээн байгуулалт ашиглалтад орсноор MNS4943-2015 стандартын түвшинд хүртэл усыг цэвэршүүлж, хоногт 50.000 м3 усыг ус дахин боловсруулах үйлдвэрт, илүүдэл цэвэр усыг 6,5 км урттай төмөр бетон сувгаар Туул голд нийлүүлэх юм байна. Ингэхдээ хуучин цэвэрлэх байгууламжийг шинэ цэвэрлэх байгууламжтай холбож ажиллуулах бөгөөд хүчин чадал сайжрахаас гадна метаны хийг хуримтлуулан боловсруулж дулаан үйлдвэрлэдэг болж байгаа аж. 

Бидний дараагийн танилцсан төсөл бол “Барилгачин групп” ХХК-ийн “Барилгачин” худалдааны төвийн бүтээн байгуулалт байв. Тус худалдааны төв нь 19984 м2 эдэлбэр газрын 10450 м2  талбайг барилгажуулж, 268 автомашины зогсоолтой байхаар төлөвлөгдсөн бөгөөд Ерөнхий гүйцэтгэгчээр “Барилгачин групп” ХХК, туслан гүйцэтгэгчээр “United engineеring”, “Голомт Илч Холдинг”, “Смарт технологи”, “Ти Ар Жи”, “Оффис Партнер”, “Конкрет полишинг флоор”, “Топ цонх”, “Дельта элеватор” зэрэг ХХК-иуд ажиллаж байгаа юм байна. Барилгын төслийн талбай дээр очиход төслийн захирал Д.Цолмонтуяа, Ерөнхий инженер Ж.Аззаяа, борлуулалтын менежер Нармандах нар төслөө танилцуулж, инженерүүдийг барилгын бүтээн байгуулалттай танилцууллаа. Төслийн гол онцлог нь галаас хамгаалах систем. Өмнө нь Монголд хэрэглэгдэж байгаагүй шинэ дэвшилтэт технологиор хийгдсэн энэ систем барилгыг давхар тус бүрээр 3 жигүүрт хуваарилан ажиллах бөгөөд утаа үнэртэх үед зөвхөн тухайн жигүүр галын эсрэг ажиллах зохион байгуулалттайгаар хийгджээ. 

Аяллын сүүлийн төсөл маань “Их Майдар” төсөл байв.  Биднийг очиход төслийн барилга угсралтын ажлыг гүйцэтгэгч “Титан манлай” ХХК-ийн захирал Ч.Отгонцагаан төслөө танилцуулж, барилгын талбайн явцыг үзүүлэв. Төв аймгийн Сэргэлэн сумын нутагт баригдаж буй аялал жуулчлалын цогцолбор болох зорилготой энэ төсөл нь 54 метр өндөр Майдар хөшөө, 9 давхар буюу 108 м өндөр суварган цогцолборын каркас угсралтын ажлыг гүйцэтгэсэн байна. Технологийн нарийн хийцлэл, шийдэл бүхий мөргөлийн зам, суварган байгууламжийг инженерүүд бахархан үзэж, шилдэг сайн бүтээл болох нь ээ хэмээн ам сайтай байлаа.

Аялалд оролцсон инженерүүд эдгээр бүтээн байгуулалтуудыг 85-95 хувийн гүйцэтгэлтэй болохоор дахин төслийн талбайтай танилцах аяллыг зохион байгуулахыг хүслээ. Энэхүү хүсэлтийг төслийнхөн болон манай холбоо хүлээн авч, эдгээр бүтээн байгуулалтуудтай танилцах аяллыг дахин зохион байгуулах болно гэдгээ дуулгахад таатай байна. Бидний дараагийн техникийн аялал тун удахгүй ......